“HAPJA DHE TOLERANCA MBI TË GJITHA”, THOTË BLENDINA HYSENI

25. shkurt 2022.

Bujanoc - Beograd - Blendina Hyseni është nxënëse e vitit të katërt në gjimnazin "Sezai Surroi" dhe është kryetare e parlamentit të nxënësve të kësaj shkolle. Ajo është një aktiviste që përpiqet t'i motivojë të rinjtë në Bujanoc që të përfshihen në projekte që i shqetësojnë dhe në këtë mënyrë t'i arrijnë më lehtë qëllimet dhe ambiciet e tyre.

Aktiviteti i parë që më hapi rrugën drejt të mirave është projekti "Qyteti ynë, shkollat tona", i realizuar nga "Grupi 484", Fondacioni "Pestaloci" dhe Trupi Koordinues i Qeverisë së Republikës së Serbisë për komunat e Preshevës, Bujanocit dhe Medvegjës. Kemi vizituar qytetin zviceran Trogen dhe fshatin e fëmijëve Pestaloci, ku kam takuar shumë të rinj dhe kam përjetuar momente të paharrueshme shoqërimi dhe mësimi”, thotë Blendina.

Ajo tregon se të rinjtë në vendin tonë janë gjithnjë e më të interesuar për t'u angazhuar në aktivitete të ndryshme.

“Këtë e kam vërejtur gjatë realizimit të aktiviteteve në kuadër të parlamentit të shkollës sonë. Kemi bashkëpunuar me shkolla të shumta nga vendi ynë dhe jashtë vendit dhe çdo herë në këto aktivitete u janë bashkuar gjithnjë e më shumë të rinj”, thotë Blendina.

Kjo e re nga Bujanoci beson se është shumë e rëndësishme që të rinjtë të jenë të hapur për marrjen e njohurive dhe aftësive të reja, të mësojnë gjuhë të tjera, të njohin kultura të ndryshme. Blendina shpjegon se të rinjtë në Bujanoc i kanë tejkaluar barrierat gjuhësore dhe kulturore dhe tani gëzojnë respekt të ndërsjellë dhe ndihmojnë njëri-tjetrin.

“Parlamenti i shkollës sonë u fokusua në zhvillimin personal të nxënësve. Ne bashkëpunojmë me shkollat e tjera dhe përpiqemi të sigurojmë komunikim të mirë mes nxënësve dhe mësuesve. Gjëja më e rëndësishme është përmirësimi i këtyre marrëdhënieve, duke përfaqësuar interesat e të gjithë studentëve. Jemi duke punuar që të gjithë nxënësit të inkurajohen që lirisht të shprehin mendimin e tyre, shton Blendina.

Sipas saj, Parlamenti Studentor “Sezai Surroi”, në bashkëpunim me shkollat e tjera, deri më tani ka realizuar aktivitete të shumta. Ajo posaçërisht thekson bashkëpunimin dhe aktivitetet e mira me të rinjtë e Parlamentit Studentor të Shkollës së Mesme “Shën Sava” dhe kryeparlamentarin, Bogdan Matiq.

“Përveç në Trogen kemi pasur vizita të përbashkëta në Beograd dhe Frushka Gorë. Realizuam një turne volejbolli, shënuam Ditën Botërore të Paqes, një aksion humanitar kushtuar fëmijëve të familjeve të rrezikuara social, si dhe një aksion të pastrimit të qytetit me slloganin “Për një mjedis të pastër”, thekson kjo vajzë punëtore.

Blendina thotë se thelbi është në hapjen ndaj ideve të reja. Ajo ka shumë plane që dëshiron t'i realizojë në qytetin e saj, për të cilën thotë se ka shumë përparësi, veçanërisht nëse nuk keni paragjykime, respektoni fqinjët dhe doni atë që bëni.

Burimi: Trupi Koordinues